SUNDIS vulgo STRAELSUNDT

SUNDIS, vulgo STRAELSUNDT

urbs Pomeraniae litoralis praeclara, et emporium apud Rugiam insulam, ex Arconae et Carenti urbium eius insulae propinquarum ruinis aucta, a Bardo urbe 4. in ortum, Gripswaldum versus ad 5. leuc. recedens. Ferrar. Baudrando urbs est permunita Germaniae in Pomerania citeriori, et in ora maris Baltici, cum portu contra Rugiam insulam. Frustra obsessa fuit A. C. 1629. ab Austriacis duce Walsteniô. Nunc iuris est Suecici pace Monasteriensi. Distat 5. milliarib. Germanicis a Gripswaldia in Borcam, uti 10. ab Anclamo, vix distat quartâ parte milliarii Germanici a Rugia insula in meridiem, et ab ea separatur fretô Gella dictô. Urbs est Hanzeatica, libera, et emporium celebre; cingiturque pro maiori parte a mari et a lacu Francken teich.